REPRODUTOR DE MÚSICA

O Meu Pais - Miro Casabella
Loading the player...

19/11/15

Mércores 25 : "Tempos Modernos"



O mércores 25 remata o ciclo de Cine de Humor con "Tempos Modernos".



Título orixinal: Modern Times
Ano: 1936
Dirección:
Charles Chaplin.
Intérpretes: Charles Chaplin, Paulette Goddard, Henry Bergman, Chester Conklin, Stanley J. Sandford, Hank Mann.
Duración: 87 min.

Será, no salón de actos do IES María Sarmiento, ás 20 horas.

17/11/15

Mércores 18: "Mon oncle" de J. Tati



O  noso colectivo continúa coas proxeccións de cine. Este mércores 18 de novembro poderemos ver en Viveiro a segunda das películas do Ciclo de Cine de Humor.

Trátase de “Mon oncle” ( “O meu tío” ) de J. Tati , da que  o crítico M. A Palomo ten escrito:"A obra de Tati permanece como un monumento luminoso á que poucos souberon achegarse. (...) nesta obra inolvidábel arremete contra a sociedade de consumo e contra o mecanicismo que afoga ao individuo. Así fai presente o absurdo da realidade cotidiana nun prodixio de fantasía que encerra ás súas persoaxes en secuencias deslumbrantes".

A proxección será no salón de actos do IES María Sarmiento e dará comezo ás 20 horas.

A entrada é libre até completar o aforo da sala.



13/11/15

O COLECTIVO FAI PROPOSTAS



PeS PROPÓN INSTALAR UNHA ESCULTURA  PARA CONMEMORAR O CENTENARIO DAS IRMANDADES DA FALA



PENSAMENTO E SEMENTEIRA vén de lle propor á  concelleira de Cultura de Viveiro, Lara Fernández-Noriega, que reúna aos colectivos socio-culturais e veciñais para programar entre todos a celebración durante o ano 2016 do centenario das Irmandades da Fala.

No escrito rexistrado hoxe no Concello polo colectivo recóllese que o vindeiro ano 2016 cúmprense os cen da fundación das Irmandades da Fala, entidade que destacou pola defensa e o uso do idioma galego  en todos os ámbitos e onde os irmáns viveireses Antón e Ramón Vilar Ponte tiveron un importante papel.
“Sendo coñecedores de que o Concello de Viveiro vai  contribuir  coa programación dalgún acto arredor deste centenario —sinala no seu escrito o colectivo— a  aconmemoración  non só debería reducirse   á tradicional conferencia divulgativa sobre as Irmandades e os irmáns Vilar Ponte”.

Así, PENSAMENTO E SEMENTEIRA proponlle á Concelleira de Cultura que a celebración  se prolongue ao longo de todo o  2016 e que nas actividades que se desenvolvan se implique á totalidade das asociacións socio-culturais e veciñais do Concello, para o que solicitan que desde o Concello se faga unha convocatoria a todo o tecido asociativo de Viveiro,

O  noso colectivo  adianta tres propostas que, de se celebrar a reunión, presentaría para o seu debate. A primeira delas consistiría en que a corporación municipal declarase o ano 2016 como “Ano das Irmandades da Fala”. Tamén propoñen que as actividades de todo tipo que organicen as asociacións durante o vindeiro ano leven como lema: “2016, ano das Irmandades da Fala”.

A última das suxestións de PeS consiste en que se estude a instalación, ao rematar o ano 2016, dunha  escultura  dedicada ás Irmandades da Fala e a Antón e Ramón Vilar Ponte , no lugar que se considere máis adecuado, e que podería ser  sufragado por suscrición popular e apoio de entidades públicas e privadas.

Viveiro 13 de novembro de 2015




Se hai unha escultura para...



Se en Ferrol hai unha escultura para lembrar a Música Tradicional...



... e en Pontevedra un grupo escultórico con  Castelao...

...ou en Lugo podemos atopar a don Ánxel Fole...

...se na Praza de Mondoñedo senta Álvaro Cunqueiro...
...ou en Ribadeo o Marqués de Sargadelos baixa as escaleiras do seu Pazo...



Por que non podemos ter en Viveiro unha escultura que lembre o centenario das Irmandades da Fala e aos irmáns Antón e Ramón Vilar Ponte?

 


10/11/15

"Crónicas diplomáticas"




 Ciclo de Cine de Humor

mércores 11 de novembro
20 horas
Salón de actos do IES María Sarmiento

Este mércores 11 de novembro dá comezo o cilo de Cine de Humor. A película que proxectaremos é "Crónicas diplomáticas". De seguido deixamosvos unha reseña publicada en "Blog de cine" por Alberto Abuín:

“Crónicas diplomáticas”,  un discurso maxistral

‘Crónicas diplomáticas’ (‘Quai D’Orsay’, Bertrand Tavernier, 2013) móstranos por primera vez de forma moi clara o lado humorístico dun autor, con todas as súas letras, que normalmente conmociona ao espectador levándoo ao peor lado humano con xoias do calibre de ‘A morte en directo’ (‘La mort en direct’, 1980) e ‘Hoxe comeza todo’ (‘Ça commence aujourd'hui’, 1999) —relato sobre o ensino e a  educación tan terrible como necesario—, ou cantos ao jazz como a imprescindíbel ‘Arredor da medianoite’ (‘Round Midnight’, 1986).
Films todos eles diferentes entre sí, aínda que ben visible o estilo de Tavernier, coa cámara sempre á altura das personaxes, para coñecer as súas miserias e  poucas alegrías, e que con ‘Crónicas diplomáticas’ parece dar una vuelta de porca pasándose  ao lado da  comedia más frenética, cecais como bálsamo —o mellor que existe, o  único verdaderamente indestructíbel— ás  hostias que nos está a dar a vida a todos os niveiss. E ademais é unha  adaptación dun cómic.
Christophe Blain e Abel Lanzac son os autores do  cómic  e tamemén os guionistas nol film deTavernier, unha historia centrada no Ministerio de Asuntos Exteriores de Francia, situado nun lugar chamado Quai d’Orsay, utilizado case sempre para se referir ao  Ministerio, de aí o título orixinal do film. Un film que basa todo o seu relato arredor da construción dun  discurso que p  ministro Taillard —sensacional Thierry Lhermitte— deberá pronunciar na sede das Nacións Unidas.

A vida con humor

Un discurso, que como moitos outros na historia do cine, supón un dos puntos álxidos da película, neste caso, finalizando co mesmo. porén esta vez o importante non é o discurso en sí, senón a grande cantidade de contratempos que o ministro, axudado polo seu gabinete, no que entrou a traballar como encargado da “linguaxe” Arthur Vlamick —un poco anódino Raphaël Personnaz—, solventan na construción do citado discurso.
Tavernier declarou terse inspirado en clásicos da comedia como ‘Un, dous, tres’ (‘One, Two, Three’, Billy Wilder, 1961) para a súa película. O certo é que o  ritmo frenético do film recorda sobre todo a da obra mestra de Wilder, sen chegar a ser tan ferinte ideoloxicamente. Tavernier non se posiciona politicamente falando, prefiere mostrar as idas e vindas dun gabinete as 24 horas do día sometido a unha presión brutal debido a intereses internacionais.
Noutras  palabras, Travernier mostra, con sentido do humor, sen resultar nen cargante nen moralista, o desastroso mundo que se agocha detrás da figura dun ministro, de calquer ministro de asuntos exteriores. Cambadelas, puñaladas trapeiras, mentiras, ambición e envexas motivan a todo a equipa do ministro, unha vida frenética á que Vlamick debe adaptarse con igual de rapidez se non quer ser devorado no camiño. Todo elo mentras o famoso discurso va construíndose e tomando forma a través de borranchos, de retallos e sobre todo de subliñadoss cun rotulador amarelo específico, o colmo da obsesión do ministro.

Inculto, mais convencido

Onde sí pon o  dedo na chaga Tavernier  e o seu brillante equipa de guionistas é no retrato case inculto do ministro e algún dos seus seguidores. Con frases tan terríbeis como “os libros  escríbense sós”, ou “sei o  bon   que é un libro polo subliñado que está”, todo isto dito cunha mistura  de seriedade e  humor moi difícil de matizar —é o milagre que obra Lhermitte—, e as contínuas citas a clásicos, sen entendelos, transmite certo medo á hora de pensar nos nosos representantes.
Unha das cumes de ‘Crónicas diplomáticas’, e que vén ao caso co comentado é precisamente a reunión entre o ministro e Molly Hutchinson —a mítica Jane Birkin en o que case é un cameo—, onde a segunda  fica completamente estupefacta ante a rapidez de palabra do representante francés e a súa contínua cita de grandes frases, misturando mesmo algunhas para construir frases sen sentido, mais pronunciadas coa maior das conviccións.
E é aí onde a película de Tavernier se alza divertida e impiadosa —esos portazos que fan que voen os papeis é unha  metáfora sobre ls palabras perdidas o misturadas que non ten comparanza—. A mensaxe pode ser clara, confusa, non dicir absolutamente nada, ou ser a salvación eterna, o que verdadeiramente importa é a convicción e elocuencia coa que é ditado o representado. Moitos creeranno, sen saber nen entender que se ten construído a base de parvadas, mentiras ou tópicos. Tavernier, aos seus case 73 anos, ten aínda moita corda”.

ALBERTO ABUÍN ( Blog de cine) (www.blogdecine.com)


09/11/15

Máis de medio cento participamos na camiñada...


A primeira das actividades que o colectivo viveirés PENSAMENTO E SEMENTEIRA realizou dentro da programación de outono resultou todo un éxito. Máis de medio cento de camiñantes participaron na excursión polos acantilados de Loiba o pasado domingo. A rota estivo guiada por membros da Asociación Nordés de O Barqueiro.

05/11/15

O 11 do 11...comeza o ciclo de Cine de Humor



Si. O 11 do 11...mais non ás 11. Será unhas horas antes, ás 20 horas deste segundo mércores de novembro.
O ciclo continuará , tamén os mércores 18 e 25, con dúas películas máis.
Seguiremos informando.

29/10/15

Comeza a andaina...

O domingo día 8 de novembro iniciamos a programación de Outono.
Saímos desde Viveiro ( Oficina de Turismo ), ás 10 da mañá, nun autobús que nos levará até o areal de Esteiro ( O Barqueiro ).
Alí agárdannos os nosos guías, os membros da Asociación NORDÉS.
Voltamos desde Esteiro, ás 17:30 horas., no mesmo autobús, para Viveiro.



27/10/15

Camiñada polos acantilados de Loiba




O domingo 8 de novembro iniciamos as  actividades da Programación de Outono.

A primeira consistirá nunha
 Camiñada polos acantilados de Loiba.

Sairemos de Viveiro ás 10 da mañá nun autobús que  trasladará  ao grupo até o areal de Esteiro, en O Barqueiro
Desde alí, e guiados por membros da Asociación Nordés de O Barqueiro, comezaremos a camiñada polos acantilados de Loiba: os areais de O Picón, Ribeira Grande, Ribeira do Carro, as furnas... todo un percorrido por esta fermosa paraxe. E se cadra sentaremos no famoso "banco" para descansarmos da camiñada.
Se queres participar connosco nesta actividade podes porte en contacto co Colectivo e inscribirte no seguinte enderezo:

pensamentoesementeira@gmail.com 

CAMIÑADA POLOS ACANTILADOS DE LOIBA

domingo 8 de novembro de 2015

10 horas: Saída desde Viveiro ( En autobús )
10:30 horas: Comezo da Camiñada. ( Desde o areal de Esteiro, en OBarqueiro )
14 horas: Descanso para xantar.*
17:30 horas: Saída en autobús para Viveiro.
18 horas: Chegada a Viveiro

Esta actividade organizada polo Colectivo PENSAMENTO E SEMENTEIRA é libre e gratuita.
Conta coa colaboración do Concello de Viveiro e da Asociación NORDÉS ( O Barqueiro )
* As persoas que queiran xantar na praia de Esteiro terán que comunicalo antes do día 6.
    ( Custe do xantar: 12 euros )




A fotografía do "Banco máis famoso...ecétera" é de Dani Caxete



25/06/15

En defensa do noso Patrimonio






NOVO ESPOLIO NO XACEMENTO ARQUEOLÓXICO DE ESTABAÑÓN -VIVEIRO


ADEGA, MariñaPatrimonio e Pensamento e Sementeira presentamos no Servizo de Protección da Natureza da Garda Civil unha denuncia polo posible espolio na vila romana de Estabañón, situada na praia da Area do concello de Viveiro.
Unha vez máis, este importante sitio arqueolóxico foi vítima da acción irresponsable e ilegal dos “caza-tesouros” que, nesta ocasión, escavaron na zona en que o Servizo de Costas do Ministerio de Medio Ambiente realizou en 2007 unha cata arqueolóxica. Esta cata no seu momento foi ridiculamente protexida e na actualidade atópase totalmente desprotexida, tal e como temos xa denunciado noutras ocasións.
Sen dúbida, un xacemento importante coma este, sen ningún tipo de protección, con catas abertas e con material arqueolóxico á vista, constitúe un reclamo para os furtivos do Patrimonio.
Lamentablemente, os espoliadores, os temporais e as desafortunadas intervencións de Costas están afectando gravemente o xacemento de Estabañón.
Por iso, as asociacións denunciantes demandamos novamente á Dirección Xeral de Patrimonio Culturas que se adopten con urxencia as medidas necesarias que eviten a desaparición e o espolio deste ben patrimonial.

08/06/15

Buscando un logo ( III )

Aquí temos o logo dun peixe feito con símbolos


E nós seguimos recibindo propostas para o deseño do logo do Colectivo.
Poden enviarse a:
pensamentoesementeira@gmail.com

07/06/15

Buscamos un logo ( I I )

Se no logo da London Symphony Orchestra, ademais das siglas LSO hai un director/a con batuta...

que podería levar o noso logo?

05/06/15

Buscamos un logo ( I )

Se o logo do Gremio de Escritores Gastronómicos é este --unha culler na  pluma estilográfica-- como podería ser o do noso Colectivo?
Admítense propostas.



24/05/15

"Na outra banda do mar construen o navío..."


"Na outra banda do mar construen o navío:
o martelar dos calafates resoa na mañá, e non saben
que están a construir a torre de cristal da miña infancia.
Non saben que cada peza, cada caderna maxistral
é unha peza do meu ser. Non saben
que no interior da quilla está a médula mesma
da miña espiña dorsal; que no galipote a quencer
está o perfume máxico da vida.
Que cando no remate ergan a vela, e na enxarcia
tremole vagorosamente no ar
será o meu corazón quen sinta o vento,
será o meu corazón".

ANTÓN AVILÉS DE TARAMANCOS

Calafates, caderna, quilla, galipote, enxarcia...
Grazas Fran Fra polas palabras coas que nos agasallaches no improvisado asteleiro da tertulia.
Grazas polo teu traballo e por ese grande entusiasmo co que construes os navíos.
Grazas, tamén ao Avilés polo fermoso poema.

Colectivo PENSAMENTO E SEMENTEIRA

23/05/15

A EXPOSICIÓN ESTARÁ ABERTA ATÉ O 30 DE MAIO


A exposición "AS EMBARCACIÓNS TRADICIONAIS DO ARCO ÁRTABRO ATÉ RIBADEO" segue aberta na Sala de Usos Múltiples do Concello, na Praza Maior.
Pódese visitar até o 30 de maio en horario de mañá ( de 11 a 14 horas ), e tarde ( de 18 a 20 horas ).

19/05/15

TERTULIA ARREDOR DA CARPINTARÍA DE RIBEIRA







O CARPINTEIRO DE RIBEIRA FRAN FRA INTERVIRÁ O SÁBADO 23 NUNHA TERTULIA EN VIVEIRO
Fran Fra, carpinteiro de ribeira en activo, intervirá o vindeiro sábado 23 de maio nunha tertulia programada dentro das actividades que, arredor do patrimonio marítimo e fluvial, organiza o noso colectivo.

A tertulia desenvolverase no mesmo local onde está aberta ao público a exposición "As embarcacións tradicionais do arco ártabro até Ribadeo", o local de usos multiples do Concello, na Praza Maior de Viveiro.

O sábado pasado abriuse esta mostra arredor do patrimonio marítimo e fluvial cunha charla que estivo a cargo do especialista Víctor Fernández, membro da Federación Galega pola Cultura Marítima e Fluvial.
Na tertulia deste sábado 23, que dará comezo ás 19 horas, proxectaranse vídeos sobre o traballo dos carpinteiros de ribeira.
A entrada é libre até completar o aforo.


14/05/15

Víctor Fernández falará sobre o patrimonio marítimo e fluvial



O sábado 16 de maio abrimos na sala de usos múltiples do Concello de Viveiro a exposición "As embarcacións tradicionais do arco ártabro até Ribadeo". Esta mostra estará aberta até o 30 de maio. No acto intervirá Víctor Fernández González, da Federación Galega pola Cultura Marítima e Fluvial..
A primeira das actividades dentro de destas xornadas arredor do noso patrimonio marítimo e fluvial dará comezo ás 19 horas. A entrada será libre até completar o aforo.

O galego, garantía de futuro


02/05/15

XORNADAS SOBRE PATRIMONIO MARÍTIMO E FLUVIAL

                                                                                         Pailebot "Sofía Moás"-Viveiro




VÍCTOR FERNÁNDEZ DA FGCMF E FRAN FRA CARPINTEIRO DE RIBEIRA INTERVIRÁN NUNHAS XORNADAS SOBRE O PATRIMONIO MARÍTIMO E FLUVIAL.

O noso Colectivo  programou para a segunda quincena de maio, en Viveiro, unhas xornadas arredor do patrimonio marítimo e fluvial.
Esta nova actividade dará comezo  coa inauguración  da exposición Embarcacións tradicionais do Arco Ártabro, Ortegal e Mariña de Lugo” que terá lugar o sábado 16 de maio, ás 19 horas no salón de usos múltiples do Concello de Viveiro. Coincidindo co acto de inauguración desta mostra, que permanecerá aberta até o día 30, o colectivo viveirés convidou a Víctor Fernández Gonzalez, directivo da Federación Galega pola Cultura Marítima e Fluvial, para falar sobre o noso patrimonio marítimo.
Outro dos actos que se terán lugar dentro destas xornadas será  o sábado 23 de maio e consistirá nunha tertulia con Fran Fra,  o único carpinteiro de ribeira activo na nosa comarca

19/04/15

UNHA CONCURRIDA TERTULIA

O público asistente abarrotou a sala da planta baixa da Biblioteca Municipal para participar na interesante tertulia arredor de San Miguel da Coelleira e a vila asulagada de Estabañón. O aforo resultou insuficiente. Así estaba a sala antes de dar comezo ao acto.


O noso colectivo agradece a participación de todas as persoas que asistiron ao acto--algunhas delas de pé e na entrada da sala--e moi especialmente a dos dous convidados á tertulia: Manuel Miranda e Manuel Gago.


10/04/15

O SÁBADO 18 DE ABRIL TEMOS TERTULIA




TERTULIA CON IMAXES DOS VESTIXIOS DO MOSTEIRO DE SAN MIGUEL E DE ESTABAÑÓN

O vindeiro sábado 18 de abril os mariñaos imos ter a oportunidade de coñecer  máis datos arredor do mosteiro de San Miguel  da Coelleira e tamén da vila asulagada de Estabañón. Serán Manuel Gago, xornalista cultural e profesor da USC, xunto co presidente da asociación sociocultural MariñaPatrimonio, Manuel Miranda, os protagonistas da tertulia convocada polo noso colectivo  que se desenvolverá , desde as sete da tarde, na sala da planta baixa da Biblioteca Municipal de Viveiro.

Recentemente Manuel Miranda ten se preocupado  sobre o futuro dos restos en Area-Faro e fixo pública a situación de precariedade na que se atopa este sitio arqueolóxico polo que, para o colectivo organizador desta tertulia, é a persoa indicada para  informar arredor da  historia da vila asulagada de Estabañón.

Manuel Gago, despois da súa última visita á Coelleira, escribiu  que esta illa “é unha das grandes fábricas de lendas de Galiza” sobre a que teñen escrito varios eruditos locais. Moitos mariñaos coñecen a lenda  que fala do seu mosteiro templario. Aínda que entre o primeiro documento que se conserva  do 1095 e os que volven aparecer, xa no XV, hai “un lapso misterioso de trescentos anos—di  Gago—nos que non hain nin rastro da historia do Monteiro de San Miguel”.
Na útima visita que Manuel Gago e Manuel Miranda de MariñaPatrimonio fixeron á Coelleira puideron comprobar que o mosteiro,“lonxe de ser un mito, existe, e segue en certo xeito en pé, mergullado en fieitos"

A proxección das imaxes sobre os vestixios do mosteiro de San Miguel e tamén as dos restos descubertos polas últimas vagas de mar en Area, servirán para completar esta tertulia á que o colectivo organizador convida a participar.

06/04/15

LEMBRANDO A ACTUACIÓNDE UXÍA E NARF


Agradecendo o traballo feito polo noso asociado Abella Albo para gravar a actuación de Uxía e Narf o pasado 27 de marzo no Teatro Pastor Díaz, deixámosvos aquí un anaquiño deste fermoso concerto.
Que vos preste!

Tertulia con M. Gago e M. Miranda



                                                                                                       Foto: Sole Felloza

"ARREDOR DUNHA ILLA, UN MOSTEIRO E UNHA VILA ASULAGADA: DE SAN MIGUEL DA COELLEIRA A ESTABAÑÓN”


O vindeiro sábado 18 de abril, ás 19 horas, o  noso colectivo viveirés organiza unha Tertulia aberta ao público que contará coas intervencións de Manuel Gago e Manuel Miranda.
“Arredor dunha illa, un mosteiro e unha vila asulagada: de San Miguel da Coelleira a Estabañón” é o título desta actividade que se desenvolverá  na sala da planta baixa da Biblioteca Municipal de Viveiro e  na que tamén  se proxectarán imáxes sobre os vestixios do mosteiro de San Miguel e o sitio arqueolóxico de Estabañón.
Manuel Gago, xornalista cultural e profesor da Universidade de Santiago de Compostela, especializado en deseño e desenvolvemento de medios dixitais e en comunicación multimedia sobre patrimonio cultural, gastronomía e ciencia e Manuel Miranda, presidente do colectivo sociocultural MariñaPatrimonio serán os encargados de descubrirnos aspectos destes dous lugares tan descoñecidos para  agrande maioría das persoas.
O colectivo organizador lembra que a entrada a esta tertulia é libre até completar o aforo da sala.


23/03/15

UXÍA SENLLE




Uxía concibe escribindo palabras e músicas que saen sempre do máis profundo e íntimo do seu ser, da alma. A súa carreira xa suma case tres décadas, anos que a converteron nunha das voces máis populares e valoradas en lingua galega.

Integrante do grupo Na Lúa ata 1991, Uxía emprende un camiño en solitario que responde a unha natural evolución da súa traxectoria. Naquel mesmo ano publica "Entre cidades", e catro anos despois, "Estou Vivindo no ceo", disco moi valorado pola crítica, que afianza a súa proxección internacional e que a leva a cantar por motos países europeos, por América e África. .

A súa paixón pola mestizaxe consigue unir e reunir voces, instrumentos, ritmos, sons... é un imán para o talento, e así o demostra como directora artística na creación do Festival Internacional da Lusofonía "Cantos na Maré", un espectáculo concibido como punto de encontro de artistas da área lusófona no que o escenario transfórmase nunha fiestra multicultural coas mellores voces de Portugal, Brasil, Cabo Verde, Guinea Bissau, Angola, Mozambique, etc.

No seu disco “Meu Canto” (Fol Música 2011) Uxía sigue a estela dunha cultura que viaxa e cambia o significado e a natureza das fronteiras. Nesta ocasión a súa travesía lévanos a Brasil, onde foi gravado este traballo, nos estudios da editora Biscoito Fino, en Rio de Janeiro, todo baixo a produción do prestixioso músico Jaime Alem (produtor de María Bethânia), a direción musical de Sérgio Tannuse a participación especial de Lenine que obtivo o 'Premio de la Música Independiente 2012' ao mellor disco en galego.

  Tamén é productora do grupo tradicional Malvela, crítica de música na Radio Galega e imparte conferencias sobre a Historia da Música Galega.

Nos últimos tempos coordinou e dirixiu varios discos e proxectos colectivos como CoraSons (Kalandraka, 2013), Maria Fumaça e Xiqui Xoque, Fiú, Fiú (Galaxia) na área infantil e 'Atlántic@s', un espectáculo galego que se presentou no MICSUR (Mar del Plata) con Narf, Budiño e Rosa Cedron.

  Editou o cd 'Andando a Tera', sobre poemas de Manuel María e 'Rosalía Pequeniña' (Galaxia 2013) no que achega os versos da nosa porta máis universal aos máis cativose cativas. 

Fran Pérez NARF

Despois de máis de vinte anos no mundo da música e formar parte de diversas bandas de rock Fran Pérez, artista relacionado dende sempre co mundo da cultura teatral e musical, creou no ano 2004 o concepto NARF.
O proxecto do polifacético músico rompeu as barreiras e converteuse nunha das aventuras musicais máis interesantes da última década en Galicia. Trátase dun artista inquedo, que investiga o ritmo e a harmonía.


14/03/15

UXÍA e NARF : "BALADAS DA GALIZA IMAXINARIA"



O venres 27 de marzo  Pensamento e Sementeira organiza no Teatro Pastor Díaz, en colaboración co Concello de Viveiro  un concerto que contará coa participación da cantante Uxía Senlle e o compositor Fran Pérez NARF, dous dos artistas do panorama actual galego máis influentes e que máis pontes teñen forxado a través da música con creadores de outras partes do mundo, en especial cos países de lingua portuguesa.

Tras anos de viaxes e experiencias de intercambio con artistas de Mozambique, Angola, Brasil, Portugal, Cabo Verde, Guinea Bissau, Arxentina,  Chile, Uruguai... tanto Uxía como Fran Pérez “NARF” foron construíndo os seus respectivos repertorios, xerando canción a canción, un pequeno ámbito de convivencia entre mundos culturais que nalgúns casos comparten a mesma orixe, e en todos a mesma paixón pola palabra cantada. Este lugar propicio para o encontro é o territorio da Galiza Imaxinaria, un espazo emocional sen fronteiras, con raíces profundas pero cos brazos abertos ao mundo de hoxe, un territorio que pertence por dereito a todo aquel que o queira transitar, e no que os rasgos de identidade presentes nas cancións, lonxe de ser barreiras, son portas de entrada.

Por  primeira vez, UXÍA & NARF funden os seus repertorios nun espectáculo conxunto, man a man, e propoñen un concerto de formato intimista, no que convidan a coñecer as "Baladas da Galiza imaxinaria". Todas e cada unha destas cancións teñen unha historia detrás relacionada cunha viaxe, cun encontro e cunha experiencia vivida a través da música, e farán as delicias  daqueles que, con espírito inquedo e aventureiro, as deixen entrar no seu corazón.

O concerto dará comezo ás 20:30 horas no Teatro Pastor Díaz de Viveiro. O colectivo organizador porá á venda as entradas (5 euros) unha hora antes do comezo do espectáculo.

10/03/15

Remata o ciclo



Co documental “Shooting, Muhammad” de Francesco Cannito e Luca Casani ( Italia, 2009)  e a curtametraxe  “Shwesh,Suez” de Riyad Deis ( Palestina ,2009 ), remata o ciclo de películas sobre Palestina que se proxectaron durante os tres primeiros meses do ano no salón de actos do IES María Sarmiento de Viveiro.

“Shooting Muhammad” conta a historia dun refugiado palestino de 21 anos que, cada mañá, colle o autobús para asistir á universidade israelí situada nun asentamento de Cisxordania. El é o único estudante árabe da facultade e comparte aula con colonos ultra-relixiosos.

A curta, “Shwesh, shwesh” está ambientada nas zonas rurais de Palestina, en 1939, ao final da revolta palestina contra o mandato británico. Un agricultor palestino e a súa familia viven unha vida tradicional cando todo cambia porque un combatente da resistencia decide agocharse nunha pequena granxa e trae ideas revolucionarias…

A sesión dará comezo ás 20 horas e a entrada é libre até completar o aforo da sala.

07/03/15

UN DOCUMENTAL ITALIANO E UNHA CURTA DE PALESTINA PECHAN O CICLO "CINE ÁRABE PARA O MUNDO"







O vindeiro mércores 11 de marzo remata o ciclo de “Cine árabe para o mundo” que  o  noso colectivo , en colaboración coa Fundación Araguaney-Ponte de culturas,  programou dentro da súa programación cultural de inverno.

O documental “Shooting, Muhammad” de Francesco Cannito e Luca Casani ( Italia, 2009)  e a curtametraxe palestiniana  “Shwesh,Suez” de Riyad Deis pecharán o ciclo de películas sobre Palestina que se proxectaron durante os tres primeiros meses do ano no salón de actos do IES María Sarmiento de Viveiro.

A sesión dará comezo ás 20 horas no salón de actos do IES María Sarmiento.

A entrada é libre ate completar o aforo.

25/02/15

O NOSO PRIMEIRO DEBATE DO ANO


O colectivo organiza o primeiro debate do ano.

PENSAMENTO E SEMENTEIRA convoca un debate arredor das posíbeis intervencións no areal de Covas que terá lugar este venres 27 de febreiro, ás 20:30 horas na sala da planta baixa da Biblioteca Municipal, na Praza Maior.

Os cambios, acentuados agora por efeito das últimas vagas de mar e as transformacións producidas nos  últimos anos no medio, que ocuparon todo o sistema dunar, construíndo espigóns e canalizacións,   deron lugar a escaseza de area e ao desequilibrio da praia.

O porto de Celeiro diminuiu drásticamente a enerxía das ondas do mar que rompen no areal provocando a perda de area no sector occidental que é transportada lonxitudalmente de oeste a este.

Estes cambios e as posíbeis intervencións da Administración no areal  preocupan á veciñanza e é por iso que o colectivo organizador programou este debate ao que se convidou á Xefatura da Demarcación de Costas de Lugo. Como os representates de Costas decidiron  non intervir neste acto o colectivo organizador decidiu solicitar á alcaldesa de Viveiro que informase das propostas que a Demarcación lle ten presentado ao Concello.

No acto pois, ademais de María Loureiro, que o fai en representación do Concello, intervirán as seguintes persoas:

-Andrés Díaz Ferro, capitán de pesca e Práctico do porto de Celeiro.
-Alexandre García, especialista en bioloxía mariña e vogal do Litoral de ADEGA e
-J. Pino, capitán de pesca

O acto contará, ademais, coa proxección de vídeos e fotografías que ilustrarán sobre os cambios sufridos polo areal de Covas.

A entrada é libre até completar o aforo da sala.

21/02/15

"Jenin, Jenin"


“JENIN, JENIN” E “LESH SABREEN ?”




O mércores 25  e dentro do ciclo de cine #Palestina que organiza o nosocolectivo  en colaboración coa Fundación Araguaney-Ponte de Culturas, proxectaranse en Viveiro dúas películas máis. Trátase do documental “Jenin, Jenin” e da curtametraxe “Lesh Sabreen ?”.

“Lesh sabreen?”, ( Muayad Alayan, 2009 ) é unha curtametraxe sobre unha xove parella do barrio palestino do oeste de Xerusalén que ten que se enfrentar a problemas económicos, actitudes conservadoras e ás consecuencias da ocupación israelí.

“Jenin, Jenin”,  ( Muhammad Bakri, 2002 ), espertou unha tormenta en Israel e até chegou ao Tribunal Supremo que tomou a decisión de prohibir a súa estrea. A película trata dos feitos de jenin en abril de 2002, cando o exército israelí invadiu o pobo de Cisxordania e o campo de refugiados como parte da chamada “Operación Escudo Defensivo”.

As proxeccións darán comezo ás 20 horas no salón de actos do IES María Sarmiento de Viveiro.
A entrada é libre até completar o aforo da sala.



14/02/15

DEBATE ARREDOR DOS CAMBIOS NO AREAL DE COVAS


O  noso colectivo  xa ten data para a celebración do debate arredor do estado actual do areal de Covas. Será o venres 27 de febreiro, ás 20:30 horas, na sala da Biblioteca Municipal de Viveiro, na Praza Maior.

 A modificación que está a sufrir o areal é motivo de preocupación para  a veciñanza. É por iso que PENSAMENTO E SEMENTEIRA organiza este debate no que intervirán as seguintes persoas:

-Alexandre García, biólogo.
-Andrés Díaz Ferro, práctico do porto de Celeiro.
-J. Pino, capitán de pesca.
-Tamén se cursou un convite para participar no debate á Demarcación de Costas de Lugo .

O acto será público , con entrada libre até completar o aforo da sala.

10/02/15

"GAZA-LONDRES" e "ESTA É A MIÑA TERRA, HEBRÓN"



Lembramos que este mércores 11 proxectaremos no IES María Sarmiento de Viveiro 2 películas máis do ciclo de cine #PALESTINA.

Ás 8 proxectarase, “GAZA-LONDRES”. É unha curta e dura 14 minutos.

Ás 8:15 dará comezo a proxección do documental  “ESTA É A MIÑA TERRA, HEBRÓN” (“This is my land, Hebron”). (72 minutos)

A entrada é de balde.

07/02/15

"ESTA É AMIÑA TERRA, HEBRÓN"




O documental “Esta é a miña terra, Hebrón” (“This is my land Hebron”,  Italia, 2010) de  Giulia Amati e Stephen Natanson e a curta “Gaza-Londres” de Dima Hamdam, (Reino Unido, 2009) serán as películas que se proxectarán en Viveiro na segunda sesión do ciclo # PALESTINA o vindeiro mércores 11 de febreiro. Esta mostra de cine, organizada polo noso Colectivo  patrocinado pola Fundación Araguaney-Ponte de Culturas, vén desenvolvéndose  no salón de actos do IES María Sarmiento de Viveiro, ás 20 horas, sendo a entrada libre até completar o aforo.  

O documental de  Giulia Amati e Stephen Natanson presenta a Hebrón, unha cidade de conflito e odio, un dos asentamentos israelís en Cisxordania, o único corazón dunha cidade palestina. O centro da cidade é agora o teatro dunha guerra entre veciños onde os principais obxectivos son conquistar un metro máis de cidade, manter a raia ao inimigo ou simplemente ficar no seu terreo.

Na curtametraxe  de Dima Hamdam, directora  naturalizada xordana aínda que orixinaria dunha familia palestina que foi expulsada de Gaza en 1948, coincidiendo con la fundación del Estado de Israel,  o protagonista Mahmoud está en Londres e a súa nai en Gaza, coincidindo co ataque masivon de 2008 levado  a cabo na Franxa .Desta terceira produción da súa autoría a directora ten Dito que “explica a destrución e a morte que conlevan os conflitos máis alá das noticias e das cifras”.   

26/01/15

Festa polo Galego

As asociacións: Queremos Galego, Colectivo Cultural Buril, de Burela; Asociación socio-cultural A Pomba do Arco, de Foz; Colectivo Cultural Ollomao, de Barreiros; Agrupación Cultural Francisco Lanza, de Ribadeo; Asociación Arrincadeira, de Riotorto; e Observatorio da Mariña pola Igualdade organizan en Foz


o vindeiro sábado 31 de xaneiro, a partir das 17h na sala Bahía de Foz, a FESTA POLO GALEGO con contacontos, chocolatada e concerto da Big Band de Foz.

16/01/15

Eu son Gaza


O Colectivo comeza a súa andaina neste 2015 programando un novo ciclo. Trátase de Mostra de cine#PALESTINA que achegamos a Viveiro grazas á Fundación Araguaney-Ponte de Culturas e ao Festival  Internacional de cine euroárabe Amal.



 A primeira das 8 películas é o documental "Eu son Gaza" ( Xordania ) da directora Asma Beseiro que afonda na importancia histórica do período 2008-2009 co brutal ataque israelí sobre Gaza, ademais do seu impacto sobre Palestina. 
A película, rodada en Gaza, é posterior aos ataques e mostra as historias persoais que non abordaron os medios de comunicación, deixando ver o impacto potencial a longo prazo, tanto social como psicolóxico.
Nesa mesma sesión proxectaremos tamén a curtametraxe "Os nenos de Ibdaa" (Palestina).
O ciclo dará comezo o día 28 de xaneiro, ás 20 horas.
A entrada é libre até completar o aforo.
PROGRAMA


Mércores 28 de xaneiro de 2015:
20 horas.
Salón de Actos do IES María Sarmiento (VIVEIRO)
-"Eu son Gaza" (Documental)
-"Os nenos de Ibdaa" (Curtametraxe)
Mércores 11 de febreiro de 2015:
20 horas
Salón de Actos do IES María Sarmiento (VIVEIRO)
-"This is my Land Hebron" (Documental)
-"Gaza-Londres" (Curtametraxe)
Mércores 25 de febreiro de 2015:
20 horas
Salón de Actos do IES María Sarmiento (VIVEIRO)
-"Jenin, Jenin" (Documental)
-"Lesh Sabreen?" (Curtamentraxe)
Mércores 11 de marzo de 2015:
20 horas
Salón de Actos do IES María Sarmiento (VIVEIRO)
-"Shooting Muhammad" (Documental)
"Shwesh, shwwsh" (Curtametraxe)