REPRODUTOR DE MÚSICA

O Meu Pais - Miro Casabella
Loading the player...

19/06/17

Na Ínsua


De esquerda á dereita: Francisco Luis R. Guerreiro (Colectivo PeS ), Manuel Miranda Ruíz ( Mariña Patrimonio ), Francisco X. Martínez Pérez ( crego e historiador ) e Roberto Pena Puentes ( arqueólogo xefe da Dirección Xeral de Patrimonio da Xunta de Galiza ).



16/06/17

Visita guiada á Cova

                                                                                                        Foto: Pedro Michelena


A segunda parte da actividade que temos programada para o sábado 17 de xuño consiste nunha visita guiada á Cova de San Xoán Vello. Non é esta a primeira vez que o noso Colectivo organiza á visita a esta Cova. Na fotografía do amigo Pedro Michelena, feita na última das visitas--xuño do 2016--poden verse parte dos integrantes daquela "Camiñada polas Covas de Covas".

 Que houbo en San Xoán Vello? vai ser á pregunta á que tratarán de dar resposta Francisco Xavier Martinez Pérez, Manuel Miranda Ruíz e Roberto Pena Puentes. De seguro que despois de participar nesta Mesa Redonda todas as persoas asistentes á mesma saberemos algo máis do que até o de agora coñecíamos.

Sabemos, iso si que a antiga igrexa de Covas existiu neste lugar até o ano 1738. Tamén coñecemos a testemuña de Nicolás Taboada Leal...Este sábado 17 volveremos do Santo Vello con máis información e co desexo de que, tanto esta Cova, como a da Doncela--coñecida tamén como Forno dos Mouros ou Cova dos Encantos--sexan, canto antes, protexidas  e declaradas posíbeis xacementos arqueolóxicos.

E para rematar este comentario, dúas preguntas:
Nos anos 60, que se vería desde a Cova de San Xoán Vello e que hoxe non podemos ver?


                                                                                            Foto do Blogue "El Deseado"

Pois as vagonetas da Mina da Silvarosa circulando polo ar camiño da Ínsua.

E agora que veremos desde ese mesmo lugar?

                                                                                                             Fotografía: PeS

Se  o eucalipto que medra diante da Cova de San Xoán Vello nolo permite, a vila de Covas ( con moitas máis edificacións ).




14/06/17

Unha igrexa engulipada polo mar?



A Cova de San Xoán Vello de Covas
A Cova de San Xoán Vello está na parroquia de Covas, concello de Viveiro (Lugo), onde chaman Concha ou Porto de Escourido.
Cóntase que a orixe do nome ten que ver coa aparición no lugar, unha Noite do San Xoán, dun home de cabelo e barba branca, vestido cunha túnica e cunha vara ao lombo. Se cadra, dise, o vello era o mesmísimo San Xoán, que seica estivo alí convivindo con outras xentes. Por iso se escolleu como santo padroeiro da parroquia.
Tamén se conta que desde aquela aparición non sucederon máis naufraxios naquela zona polo que a cova, ao dicir dalgúns, foi usada por moito tempo como templo dedicado ao santo patrón.
En 1738 construíuse unha nova capela e trasladouse o culto ao Coído Vello, onde, despois de varias reformas e ampliacións, aínda sigue agora a igrexa parroquial.
Conta a lenda que a igrexa do santo vello foi asolagada, engulipada polo mar da Concha, mais non a imaxe (da construción?, do santo?) que aínda se albisca reflectida sobre a auga cando a preamar das mareas máis grandes.

Unha orixe do chamado soño de San Xoán
Tamén se dá conta do motivo polo que a imaxe do San Xoán que hai na igrexa parroquial ten un lagarto no lombo. Cando o santo andaba polo deserto, mentres durmía apoiado nunha pedra, o lagarto subíuselle enriba e xa non baixou. Quen o ve di que dorme coma un anxiño.

http://www.galiciaencantada.comhttp://www.galiciaencantada.com

13/06/17

Nicolás Taboada Leal e as augas da Cova




Lembramos hoxe aquí ao viveirés Nicolás Taboada Leal. Taboada escribiu, entre outras obras, Hidrología médica de Galicia .



Nesta obra, publicada en 1887, dedícalle un capítulo á Cova do Santo Vello, na parroquia de Covas. Titúlao AGUAS DE COBA e, entre outras cousas, dí:

"Na nosa mocidade estivemos diferentes veces nesta admirábel gruta, e lembramos que naquela época aínda se conservaban restos das tres paredes, testeira e laterais do antigo templo. Entón aínda existían os ocos ou criptas nas que tiñan estado colocados os altares, e tampouco se tiñan borrado enteiramente os sinais dalgunhas pinturas, que aínda se notaban en varios puntos da caverna..."

Mais deixamos  a cousa así...Na Mesa Redonda do sábado 17, continuaremos coa historia.

12/06/17

Quen vai intervir na Mesa Redonda?


Francisco Xavier Martinez Pérez é un estudoso do tema que nos vai a informar sobre as orixes da antiga igrexa de Covas. Viveirés e actualmente arcipreste de Ortegal-As Pontes. Publicou traballos de investigación histórica, entre outras, na Revista de Estudos Mindonienses e tamén escribiu unha reseña sobre a antiga igrexa parroquial de Covas.


Manuel Miranda Ruíz, actual presidente da activa asociación MariñaPatrimonio. Miranda é un incansábel defensor do patrimonio cultural da Mariña Luguesa. Participou, xunto co presidente do noso Colectivo e membros do Goberno Municipal de Viveiro na reunión que o pasado mes de marzo tivo lugar nas dependencias da Dirección Xeral de Patrimonio para reclamar a protección das covas da Doncela e de San Xoán Vello.


Roberto Pena Puentes, arqueólogo e actualmente Xefe do Servizo de Arqueoloxía da Dirección Xeral de Patrimonio da Xunta de Galiza.

Desde o Colectivo PENSAMENTO E SEMENTEIRA agradecemos a colaboración de Martinez, Miranda e Pena que fan posíbel esta actividade.

Tamén agradecemos a colaboración do Concello de Viveiro e a dos membros de Protección Civil.

10/06/17

O sábado 17 de xuño Mesa Redonda na Ínsua



Xa temos data para a Mesa Redonda: o sábado 17 de xuño. 
 A actividade tería lugar, se o tempo o permite, na área etnográfica da Ínsua moi perto da cova. Na Mesa Redonda participarían o estudoso Francisco Xavier Martinez Prieto, Manuel Miranda, presidente de Mariña Patrimonio e  o xefe do servizo de arqueoloxía da Dirección Xeral de Patrimonio, Roberto Pena Puentes.
A actividade que titulamos “Que houbo en San Xoán Vello?” darái comezo ás 18:30 horas. Unha hora máis tarde, ás 19:30 está programada a visita guíada á cova.


08/06/17

Que houbo en San Xoán Vello?



                                                                                                  Fotografía: M. Miranda


O pasado mes de marzo o presidente do noso Colectivo e membros da directiva de Mariña Patrimonio, acompañados por María Loureiro, alcaldesa de Viveiro, e polo  tenente de alcalde Suso Fernández estiveron na Dirección Xeral de Patrimonio da Xunta de Galiza interesándose pola protección das covas de San Xoán Vello e da Doncela.
Daquela era a nosa intención complementar estas xestións coa divulgación do pasado destes sitios. Así que, agora, estamos a programar un acto público e unha visita guiada á Cova do Santo Vello. No acto participarían o estudoso Francisco Xavier Martinez Prieto, Manuel Miranda, presidente de Mariña Patrimonio e un arqueólogo.
Axiña concretaremos data e lugar. 



29/05/17

Conversa con Manuel López

A editorial Embora organizou en decembro do pasado ano, en Ferrol, a presentación de Tres balas. Hai uns días o clube de lectura da libraría Bahía, en Foz, programou unha das súas sesións para conversar co autor arredor desta novela curta e agora  a libraría Porta da Vila  organiza esta presentación en Viveiro.



O autor, Manuel López, Manolo de Lar, nado en 1956 en Catarou, na parroquia viveiresa de Galdo, impresor e  tamén autor do libro Camiños de escuma e vento (2013),  achega agora aos seus conveciños a súa  primeira ficción novelada.


O libro de Manuel López conta con ilustracións doutro viveirés, Xosé L. Neira Brochs.


28/05/17

O meu país é verde, neboento...


O concerto didáctico co que onte nos agasallou SondeNós vai ficar durante moito tempo na memoria das persoas que enchimos o salón de actos do Conservatorio Profesional de Música de Viveiro.



Alí, entre outras pezas soou O meu país, a "fantasía ou recreación--así a presentou o director Plácido Travieso--desde o respecto, desta fermosa melodía de Miro Casabella" co texto de Xoán Manuel Casado.
E, como se pode comprobar na fotografía, tivemos un dobre agasallo: o partillar este concerto co cantautor Miro Casabella.


Neste concerto, por indicación do director de SondeNós--profesor do Conservatorio de Viveiro--cambiamos a disposición do cenario. E a verdade todo ficou moito ben.


Grazas a SondeNós por este fermoso agasallo de Música e Lingua, por esta Identidade.





11/05/17

LUCUS ENSEMBLE




Lucus Ensemble  nace en Lugo no ano 2014. Despois de coincidir en diversos concertos benéficos, un grupo de músicos con amplia experiencia pensan na posibilidade de crear unha formación estable na capital lucense para o desenvolvemento de proxectos musicais adaptados para un ensemble mixto vento-corda-percusión baixo a dirección musical de Alejandro Troya. Éste farase cargo tamén, xunto con outros membros da agrupación,  de ultimar as adaptacións e arranxos necesarios do programa, sendo ésta unha das características identificativas do grupo, xa que todo o repertorio está arranxado por e para o Ensemble. Conta cun plantel fixo de once músicos:

  • Oboe                                      Mateo Bande
  • Frauta                                    Cristina Díaz
  • Clarinete                                Miguel A. Díaz
  • Clarinete                                Adrián Balboa
  • Clarinete baixo                       Santiago Noriega
  • Saxofón                                 Alejandro Troya
  • Trompa                                   Moisés López
  • Fagote                                    Xosé Fernández
  • Violonchelo                           Cristina Nogueira
  • Contrabaixo                           Araceli Martínez
  • Percusión                               Carlos Vázquez

05/05/17

LUCUS ENSEMBLE en Concerto


Este ano celebraremos o Día das Letras co concerto de LUCUS ENSEMBLE o domingo 14 de maio. Será no Salón de Actos do Conservatorio Profesional de Música de Viveiro, ás 12:30 horas. A entrada, libre até completar o aforo do local.



19/04/17

Un debate moderado por un xornalista



O venres 21 de abril organizamos un debate sobre a normativa dos plantíos de eucalipto. Un asunto que está de actualidade e que o noso Colectivo escolleu, como noutras ocasións, considerando que vai ser de interese para a veciñanza que se achegue até o salón de actos da Biblioteca Municipal de Viveiro.
O debate vai estar moderado polo xornalista, director de A Mariña-El Progreso, Xavier R. Lombardero. Lombardero naceu na Pontenova en 1967. Licenciado en Xornalismo pola facultade de Ciencias da Información da Universidade Complutense de Madrid, comezou a súa carreira profesional na editorial madrileña Tecnipublicaciones S.A. e traballou para o grupo editorial Walters Kluwer, tamén en Madrid.
En 1993 incorporouse a La Voz de Galicia en Lugo, desempeñando labores de fotógrafo, reporteiro e xefe de Redacción. Foi delegado provincial de La Voz en Ourense e desde o 2005 pertencía á redacción central do xornal en Sabón (Arteixo), onde traballou nas seccións de Reportaxes, Fin de Semana, Apertura e Opinión.
En 1997 publicou Homes do bonito en colaboración con Caixa Galicia. A través dun diario de a bordo e fotografías, plasmou a vida dos mariñeiros de Burela e Celeiro durante dúas mareas en sendas costeiras do bonito, traballo polo que recibiu o premio Xornalismo-Empresa da Fundación CEL. Apaixonado do mundo do mar e a pesca, tamén foi remeiro en distintos clubs, incluíndo a traiñeira do Club de Regatas Perillo, en Oleiros.
Representando a PROMAGAL, asociación de produtores de madeira, estará Ramón Reimunde Noreña. Reimunde, que na súa etapa de profesor exerceu durante uns anos  no Instituto Vilar Ponte de Viveiro, naceu en San Martiño de Mondoñedo (Foz) en 1949, estudou Enxeñaría Naval en Oviedo e Madrid, Náutica na Coruña e Filoloxía en Santiago de Compostela. Foi piloto e capitán da Mariña Mercante, licenciado en Filoloxía Hispánica e en Filoloxía Galego-Portuguesa e colaborou con artigos en xornais como El Progreso e La Voz de Galicia e ten participado en xornadas de ensino e congresos. Autor de ensaios (Ben pode Mondoñedo desde agora. A eséncia popular na obra de Manuel Leiras Pulpeiro, 1998; A costeira, 2006 e O tesouro do Monte, 2014, entre outros).  Foi gañador do XII Premio Literario Ánxel Fole en 1998. Reimunde é propietario forestal nos concellos da Mariña Luguesa de Alfoz, Foz, Cervo e Lourenzá- Posúe aproximadamente 150 ha. de monte en unión coa familiar Reimunde SAT, das que 10 ha. están a piñeiro radiata, 10 a piñeiro de Oregón, 5 a frondosas e o resto a eucalipto globulus. Conta con proxecto de ordenación desde o ano 2002. Desde 2014 é presidente da asuciación de produtores de madeira (PROMAGAL).
Adela Figueroa Panisse ( Lugo, 1948 ), é unha bióloga e escritora galega. Licenciada en Ciencias Biolóxicas pola universidade de Compostela en 1971. Catedrática de Bioloxía-Xeoloxía no IES Lucus Augusti desde 1996, participou na fundación de organizacións como ADEGA da que foi presidenta, a AS-PG e a revista O ensino. Foi tamén voceira de Nunca Máis en Lugo e ten colaborado en diferentes revistas como Cerna ou Enciga, en xornais como El Progreso, La Voz de Galicia, Xornal.com, Vieiros  e A Nosa Terra. Autora de Vento de amor ao mar (2003), Xanela aberta (2009), Memória de pés sem sombra (2017), Madeira de mulher (2011) e Loita contra o lume entre outras obras. Figueroa é na actualidade vogal da Asociación para a Defensa Ecolóxica de Galiza  (ADEGA) e presidenta da Fundación Eira.


18/04/17

Un agasallo para o mes de maio


Un agasallo que chegará   a Viveiro desde Lugo.
Seguiremos informando nos vindeiros días.

15/04/17

O DECRETO DO EUCALIPTO, A DEBATE



O DECRETO DO EUCALIPTO A DEBATE, NOVA ACTIVIDADE DO COLECTIVO PENSAMENTO E SEMENTEIRA

O vindeiro venres 21 de abril, o colectivo   organiza un debate arredor do novo decreto do eucalipto que regulará os plantíos desta árbore e que está a provocar reaccións entre os propietarios de montes, concellos e organización ecoloxistas.

PENSAMENTO E SEMENTEIRA convidou para participar neste debate ao presidente da Asociación de Produtores de Madeira  (PROMAGAL), Ramón Reimunde Noreña e á vogal da Asociación para a Defensa Ecolóxica de Galiza (ADEGA), Adela Figueroa Panisse. O moderador deste acto público que se desenvolverá o vindeiro venres 21 de abril, na sala da planta baixa da Biblioteca Municipal de Viveiro, na Praza Maior, será o xornalista Xavier R. Lombardero.


O acto, que dará comezo ás 20:30 horas, é aberto até completar o aforo da sala. O noso Colectivo, que xa ten convocado outros debates arredor de temas de interese xeral, convida a asistir á toda a veciñanza e moi especialmente ás directivas das comunidades de montes.

11/03/17

Desta vez non vai de música...



Desta vez non vai de música...Estamos a organizar un debate arredor do "decreto do eucalipto".
Participarán produtores da comarca, haberá representación ecoloxísta, moderará un xornalista.
Terémosvos informados.

09/03/17

Grazas, Sofía, polo teu agasallo.



O pasado 8 de marzo tivemos a sorte de ter en Viveiro á cantautora mugardesa Sofía Espinheira. Sofía presentounos o seu traballo Aló onde agroman as herbas.
As cancións da súa autoría foron todo un agasallo. Grazas, Sofía e até outra!

13/02/17

O 8 de marzo:concerto de Sofía Espinheira




O mércores 8 de marzo termos en Viveiro a Sofía Espiñeira.
Sofía Espiñeira nace en 1986 na vila de Mugardos, onde pasa toda a súa infancia e adolescencia. Achégase á música dende pequena, cursando co clarinete como instrumento a formación de Grado Elemental no Conservatorio Profesional de Música de Ferrol entre os 10 e os 14 anos de idade. De seguido comeza a tocar a guitarra e a cantar de xeito autodidacta, compoñendo os seus primeiros temas.
Nos anos posteriores cursa os estudos de xornalismo na USC, rematándoos no 2009 na cidade de Rennes, Francia. É durante esta etapa universitaria cando comeza a adentrarse no traballo corporal e artístico, achegándose á danza contemporánea e ás técnicas circenses. Finalizada a universidade realiza un ano de formación na Escola Navarra de Circo Oreka, en Pamplona, a cal lle da as ferramentas para comezar a súa andanza profesional nas artes escénicas. De volta a Galicia no outono do 2010 afíncase en Santiago de Compostela, comezando a traballar con Roberto C. Mouriño na compañía de teatro e títeres Titereficciós, coa que continúa actualmente.
No 2010 establece contacto coa Asociación Circonove, onde continúa o seu entrenamento e aprendizaxe circenses colaborando nalgún cabaré, traballando coa bailarina e clown Alba Moreno Biurrun na compañía Resueltas (2010-2012) e participando nas primeiras funcións do especNo 2015 nacen novos proxectos vinculados á danza, ó teatro e á música. Unha proposta poético – teatral a dúo coa poeta soriana Carmen López Roca:  Huevos fritos y vino tinto. Tamén emerxe unha nova xuntanza a catro, a compañía Teatro ó Cubo, xunto cos actores Alfredo Pérez Muiño, Roberto C. Mouriño e o escritor Jose Luis Baños de Cos, cunha proposta de teatro musical para público familiar: O faiado. No ámbito da danza, comeza a traballar como bailarina nos concertos infantís de Estamos no verán, a novela – disco de Xoán Curiel e Charo Pita.táculo Impreuna , de Pista Catro.
En Abril dese mesmo ano resulta gañadora do II Certame de canción de autor do concello de Teo, o cal lle permite grabar o seu primeiro disco, Alá onde agroman as herbas. Este traballo lle da pé a comezar a súa andanza como cantautora, que se inicia co seu primeiro concerto en decembro no festival Treme a terra, en Pontedeume e continúa a desenvolverse neste ano 2016 coa súa xira de concertos en diferentes salas e espazos culturais presentando o seu álbum.





06/02/17

Acto informativo



A primeira das nosas actividades deste 2017, a charla informativa arredor das cláusulas chan, tivo moita acollida. Agradecemos a Patricio Viveiro, avogado e asesor da asociación Con Lupa Contra a letra pequena,  a súa participación.
Nos vindeiros días informaremos sobre as novas actividades do Colectivo.

27/01/17

As abusivas cláusulas chan



Este vai ser o noso primeiro acto deste 2017.
Despois de celebrada en xaneiro a Asemblea ordinaria do Colectivo onde falaremos da programación para o primeiro semestre, este acto informativo arredor das abusivas cláusulas chan abrirá as actividades de 2017.
O avogado Patricio Viveiro estará na Sala da planta baixa da Biblioteca Municipal para informar arredor deste asunto que--supomos--afecta á veciñanza que está a soportar hipotecas bancarias.
Por se é do voso interese reproducimos aquí a entrevista publicada en La Voz de A Mariña (La Voz de Galicia) con Patricio Viveiro.

http://www.lavozdegalicia.es/noticia/amarina/2017/01/20/marina-levase-palma-afectados-polas-clausulas-chan-hai-maior-numero/0003_201701X20C6999.htm