REPRODUTOR DE MÚSICA

O Meu Pais - Miro Casabella
Loading the player...

25/02/18

O 1 de marzo, en Burela


O 1 de marzo voltamos ás rúas de Burela para seguer defendendo a Área Sanitaria da Mariña. O noso Colectivo, que fai parte da Plataforma convocante da manifestación, quer contribuir unha vez máis con esta causa. Somos un colectivo sociocultural que non pode ficar calado mentras se debate a posíbel supresión da Área Sanitaria da Mariña. E somos un Colectivo que desenvolve as súas actividades en Viveiro, un concello que ficaría seriamente prexudicado de se levar adiante a reforma da Lei que se está a debater no Parlamento de Galiza.

Viveiro, ademais, está a aportar moita veciñanza a estas mobilizacións. Foron, como xa se ten informado, cinco autobuses  de Viveiro os que se desprazaron á última manifestación en Compostela o que da idea do traballo feito na nosa localidade polos membros de Somos unha Área-Viveiro que programaron varias actividades de todo tipo--asembleas, concertos musicais, presenza en probas deportivas, bailes reivindicativos...--para manter á veciñanza informada en todo momento.

E agora que se convoca unha nova mobilización--outra volta en Burela--facemos un  chamamento á nosa veciñanza: temos que voltar a Burela, o día 1 de marzo, ás 20 horas e alí manifestar o noso desacordo co que se pretende: a eliminación da Área Sanitaria da Mariña.

Así que xa o sabedes, animade aos vosos familiares, ás amizades, aos conveciños para voltar a Burela o xoves. Alí nos veremos.

01/02/18

Agora toca Compostela



Despois da intensa campaña informativa desenvolvida pola Plataforma en Defensa da Sanidade Pública--organización da que o noso Colectivo fai parte-- e das actividades desenvolvidas en Viveiro convocadas por Somos Unha Área-Viveiro agora toca viaxar a Compostela para nos manifestar.
Así que, a encher os autobuses!. Porque SOMOS UNHA ÁREA.

10/01/18

De San Cibrao a Burela

Como xa sabedes, o noso Colectivo fai parte da Plataforma na Defensa da Sanidade Pública da Mariña e tamén estamos participando nas actividades que organiza  Somos unha Área-Viveiro. Agora toca rematar este percorrido de Viveiro a Burela participando na terceira das etapa da Caravana pola Sanidade Pública que sairá do Centro Sanitario de San Cibrao para chegar a Burela. Alí xuntarémonos cos autos que veñen de Foz e Ferreira. Tomade nota, pois.
Sábado 13,  ás 11 horas, desde o C. Sanitario de San Cibrao

02/01/18

O xoves 25 de xaneiro: Asembleas Xerais


O xoves 25 de xaneiro o noso Colectivo celebrará dúas Asembleas Xerais: unha, a Ordinaria, onde faremos un resume da nosa actividade ao longo do pasado 2017 e programaremos as vindeiras actividades para este 2018 e outra, a Extraordinaria, onde renovaremos a Xunta Directiva. 
Serán no noso local social, na rúa Irmáns Vilar Ponte, 40, baixo, dreita e darán comezo ás 20 horas.




15/12/17

Caravana pola Sanidade, desde Xove







A segunda etapa da Caravana en defensa da Sanidade Pública sairá da Praza do Concello de Xove ás 11 da mañá e rematará no Centro de Saúde de San Cibrao.

A Plataforma da Mariña animámosvos a participar.

Ás 10.45 horas en Xove!#SomosUnhaÁrea

28/11/17

Vémonos na Fontenova




O xoves 30 de novembro é o día da Concentración na defensa da Sanidade Pública.

Son varios, e de todo tipo, os colectivos que apoian esta reclamación: deportivos, educativos,sindicais, de comerciantes...E o Colectivo PENSAMENTO E SEMENTEIRA tamén está aí. E fai un chamamento non só dirixido ás persoas asociadas. A convocatoria de SOMOS UNHA ÁREA-Viveiro é para toda a veciñanza.
Así que xa sabedes o xoves 30 de novembro, ás 8 e media da tarde, estaremos na Vila, na Praza da Fontenova. E se a veciñanza responde, habémola encher.